Mother’s Day Workshop

母親節親子插花工作坊

Flower Workshop

今個星期日(13號)就係母親節啦,各位孝順仔孝順女,諗好點同媽媽慶祝未呢?黛安知道非牟利慈善團體「花慧綻」,今年首度喺母親節舉辦插花工作坊,畀媽媽同囝囝囡囡互動,一齊插出又靚又獨一無二嘅花,相信收到嘅媽媽一定開心又難忘。

本身係教支源協會分支嘅花慧綻,以花藝作平台,畀有特殊需要和特殊學習需要(SEN)嘅年輕人,可以透過學習花藝自由綻放才能,並投入主流社會貢獻一分力。李嘉誠基金會都好支持佢哋嘅工作,早前就捐咗200萬元畀佢哋發展;而花慧綻位於觀塘嘅花店最近已開張,今次插花工作坊活動,母親節當日亦會喺花慧綻花店進行。

花慧綻公關姊妹話,參加活動嘅媽媽同仔女,當日除咗可以一齊插花,透過活動仲可以同花慧綻嘅花藝師交流,了解更多插花知識;而活動人數係8-10組家庭(媽媽和一位子女為一組),費用每組$250(已包材料費),不過活動人數有限,額滿即止,所以報名就要快啦。如有其他查詢,可提供姓名及電話電郵至flowerjamming@blossomminds.org查詢。